Co solsticio de verán chega unha das celebracións máis especiais do ano na Eira da Xoana. Unha xornada para atoparnos, compartir mesa, cultura e música, e celebrar a chegada da estación máis luminosa do ano nun espazo único de natureza e convivencia.

Ao longo da tarde teremos a oportunidade de coñecer mellor a riqueza natural do Monte Rubio nun roteiro interpretativo guiado por Iván Orois e Elisa. A continuación, a compañía Fantoches Baj achegaranos o seu teatro popular coa representación de “A viaxe feliz de Ramón Sanfiz”, unha proposta chea de humor, emoción e memoria.

A música seguirá sendo protagonista coa actuación do cuarteto de frautas deBíselas, que dará paso á tradicional sardiñada solidaria e á gran foliada aberta para celebrar a noite máis curta do ano con Bico da Balouta, Raúl Galego e todas as persoas que se queiran achegar para cantar, tocar e compartir festa.

Como sempre, a Eira convértese nun espazo de encontro para persoas de todas as idades, onde a cultura galega, a amizade e o respecto pola natureza son os verdadeiros protagonistas.

PROGRAMA

14:00 h – Xantar de convivio.

16:00 h – Roteiro interpretativo dos endemismos do Monte Rubio, guiado por Iván Orois e Elisa.

18:00 h – Teatro: A viaxe feliz de Ramón Sanfiz, por Fantoches Baj.

19:00 h – Actuación do cuarteto de frautas deBIselas.

21:00 h – Sardiñada solidaria. Donativo: 10 €.

A continuación – Foliada aberta con Bico da Balouta, Raúl Galego e todas as persoas que se queiran achegar para cantar, tocar e compartir festa.

O verán comeza na Eira. Trae ganas de gozar, compartir e celebrar.

Agardámoste! ?????